Святы Мікалай зноў прыйдзе да нарачанскіх дзяцей
У нарачанскай парафіі ў чарговы раз праходзіць перадкалядная акцыя “Святы Мікалай ідзе да дзяцей”.
У мінулым годзе ў Год міласэрнасці ў нарачанскай парафіі была аб’яўлена акцыя “Святы Мікалай ідзе да дзяцей”.
Гэта акцыя мела на мэце падарыць свята дзецям-інвалідам і дзецям з малазабяспечаных сем’яў парафіі. Удзельнікам акцыі мог стаць кожны: трэба было толькі прынесці якую-небудзь рэч: цацку, канцылярскія тавары, цукеркі і пакласці ў каробку, якая стаяла ў касцёльным кіёску. З гэтых рэчаў і былі сфарміраваны падарункі ад Святога Мікалая для дзяцей.
Акцыя трывала ў парафіі некалькі тыдняў, і хочацца адзначыць, што каробка, якую парафіяне назвалі ”каробкай добрых спраў”, неаднойчы станавілася поўнай. Гэта акцыя стала цудоўнай нагодай не толькі для дарослых стаць міласэрнымі, як Айцец, але і для бацькоў і катэхэтаў навучыць дзяцей уменню дзяліцца тым, што маеш, з бліжнім.
Так дзякуючы людской міласэрнасці і зычлівасці Святы Мікалай змог прынесці свята не ў адно дзіцячае сэрца.
Год міласэрнасці ў Паўсюдным Касцёле закончыўся, але плёны яго будуць доўга трываць, калі мы будзем падобнымі да нашага Нябеснага Айца.
Аўтар: Адміністратар