Кветкі для Кардынала, або Любові не бывае замнога
Сёння, у пятую гадавіну смерці Казіміра Свёнтка, у нарачанскім касцёле цэлебравалася Святая Імша за памерлага кардынала, а ў Пінску, горадзе, дзе спачывае каталіцкі іерарх, мела сваё завяршэнне акцыя “Кветкі для Кардынала”.
Нарачанцы заўсёды з вялікай любоўю і пашанай адносіліся да асобы кардынала Казіміра Свёнтка. Не адно пакаленне нарачанскай моладзі выхавана на прыкладзе гэтага ахвярнага пастыра і сапраўднага сведкі веры.
Так, да пятай гадавіны смерці кардынала ў парафіі была аб’яўлена акцыя “Кветкі для Кардынала”, у якой прынялі ўдзел не толькі дарослыя, але нават дзеці і моладзь нарачанскай парафіі.
Сімвалічным з’яўляецца тое, што сёння пасля Святой Імшы за памерлага кардынала ў Пінску, кветкі ў крыпту, дзе спачывае Казімір Свёнтак, прынеслі нарачанцы. Два браты, Данік і Лёня, былі ў Пінску на рэкалекцыях, а маладая мама Каця (былая нарачанка), якая зараз жыве ў Пінску, займалася набыццём кветак і таксама прыйшла ў пінскую катэдру на Святую Імшу, каб дзякаваць Богу за асобу гэтага вялікага чалавека.
Для нарачанцаў кардынал Казімір Свёнтак пры жыцці быў прыкладам веры, надзеі, любові і прабачэння.
І гэты прыклад ужо зараз дае вельмі багатыя плёны.