Жыццё з Богам

30 ліпеня адбылася пілігрымка дзяцей нарачанскай парафіі па касцёлах Гродзеншчыны.

У нашай парафіі існуе добрая традыцыя летам арганізоўваць пілігрымку для дзяцей, якія ў гэтым годзе прыступілі да Першай Споведзі.

Гэта цудоўная нагода зноў сабрацца разам, каб не толькі наведаць сакральныя месцы, памаліцца, паспяваць, але і адчуць сябе адной дружнай хрысціянскай сям’ёй.

У гэтым годзе шлях маладых нарачанцаў ляжаў на Гродзеншчыну, якая славіцца сваімі прыгожымі храмамі.

Міхалішкі, Варняны, незабыўныя Гервяты, Астравец і нарэшце Гудагай  – не маглі не захапіць.

І хоць вельмі цяжка запаміналіся назвы незнаёмых вёсак, блыталіся ў галаве стылі архітэктуры і прозвішчы фундатараў, але зразумелым было адно: у Беларусі людзі паўсюль славяць Бога.

Час пілігрымкі праляцеў вельмі хутка, але ў сэрцах дзяцей назаўсёды засталося ціхае і светлае шчасце адчування жыцця з Богам.

Аўтар: Адміністратар