Конкурс ведаў, прызы, забаўляльная праграма, салодкі пачастунак, дыскатэка, або “Андрэйкі” ў Нарачы

30 лістапада ў нашай парафіі адбылося  дэканальнае моладзевае спатканне “Андрэйкі”, на якім як падрыхтоўка да 100-годдзя з дня нараджэння Казіміра Свёнтка быў праведзены  конкурс ведаў  “Бог даў вярнуцца Вам на бераг Піны, каб праўды веры людзям адкрываць”, прысвечаны жыццёваму шляху першага беларускага кардынала.

У нарачанскую парафію на свята разам са сваімі святарамі і законнымі сёстрамі прыехала моладзь  з Будслава, Мядзела і Свіра.

Распачалося свята Святой Імшой. У казанні, якое  прамовіў кс. Багуслаў Маджэеўскі, святар яшчэ раз нагадаў моладзі пра жыццёвы шлях кардынала Свёнтка і тыя выпрабаванні, якія выпалі на яго лёс. Кс. Багуслаў заклікаў маладых людзей па прыкладу кардынала ніколі не губляць веры і ў сучасным свеце быць сведкамі Хрыста і Евангелля.

Пасля Святой Імшы адбыўся конкурс ведаў, у якім прынялі ўдзел 85 чалавек.

Працягнулася свята дыскатэкай з забаўляльнай праграмай, падчас якой моладзь весела бавіла час, а журы ў гэты час падводзіла вынікі конкурсу.

Большасць прызавых месцаў занялі прадстаўнікі мядзельскай парафіі. Былі таксама пераможцы з Нарачы, Будслава і Свіра.

Завяршылася свята ўручэннем падарункаў пераможцам конкурсу і супольнай малітвай.

Аўтар: Адміністратар