Сёлетнія будслаўскія ўрачыстасці адбываюцца  пад дэвізам Totus Tuus («Увесь Твой») — так гучыць дэвіз біскупскага служэння Святога Яна Паўла ІІ, які звярнуў гэты заклік да Найсвяцейшай Панны Марыі.

Духоўныя пілігрымы пілігрымкі Нарач-Будслаў (137 чалавек з розных куткоў Беларусі і свету) падрыхтавалі для Маці Божай Будслаўскай у падарунак кветкавую кампазіцыю (зроблена Маінай Навумчык) : фрагмент  герба Папы Яна Паўла ІІ.

Такім чынам пілігрымы хочуць акцэнтаваць увагу на тым, што Святы Ян Павел ІІ сваё жыццё цалкам аддаў у рукі Марыі.

Адначасова духоўныя пілігрымы хочуць праз гэты жэст даручыць Маці Божай Будслаўскай сябе саміх, родных, блізкіх, а таксама нашу Бацькаўшчыну Беларусь.

Будслаўскі рэп

Не дае карона да Цябе нам крочыць,

Хоць кожны пілігрым гэтага хоча.

Ў малітвах мы Маці заўсёды з табой,

Пілігрымуем у думках у Будслаў Твой.

Духоўны пілігрым гучыць горда.

Ты выслухаеш нас – верым цвёрда.

Ў 15 гадзін яднаемся з Табой

І просім Твайго Сына даць мір і супакой.

Была для нас Ты Маці крыніцай святла.

І пуцяводнай зоркай заўсёды была.

Развей цемру ночы, надзею нам дай

І  ахіні плашчом Сваім наш беларускі край.

Каранавірус не вечны – Бог ўратуе нас.

Мы свята верым: прыйдзе лепшы час.

Зноў будзе Будслаў пілігрымаў вітаць,

І сонца надзеі на ўсходзе ўставаць.

Заўтра прадстаўнікі нарачанскай духоўнай пілігрымкі складуць інтэнцыі да Маці Божай Будслаўскай і прывязуць у падарунак кветкі ад імя ўсіх пілігрымаў, якія ў гэтым годзе не змаглі прыйсці ці прыехаць у Будслаў з верай у тое, што каранавірус не вечны і Будслаў, асветлены промнямі надзеі, зноў будзе вітаць пілігрымаў.  

Аўтар: Ірына Шнітоўская